Šaka jada i Facebook - ovci

Najčitanije vijesti

Vezane vijesti

Zadnji recepti

Najnoviji videi

Igre, igrice

Vijesti 1

Vijesti 2

A dežurnin komentatorima po internetu i političkin jastrebima koji se sakrivaju iza vladajuče koalicije nije jasno kako in se jedna anonimna ekipa uvatila kvarit idilu vladanja i gospodarenja. Ma da su to bili oporbenjaci onda bi in bilo laške napadat ali ovod su niki novi klinci sa Facebook-a, ekipa koje če kako sad stvari stoje godinan tražit posal sve dok in ne prikipne i dok ne spakuju kufere pa pođu vanka trbujon za kruvon.

Ma sve se pitan disu ti nezaposleni koji je danas priko 350 ijada, alo ekipa, oli ovi demonštracjuni nisu i za vas. Neznan ča bi reka jema bit da in voda još nije došla do grla. Čitan po internetu koliko se sve svita skupilo na demonštracjunima po raznin gradovima naše nan drage Domovine, ma nebi sve skupa stalo na Splisku Pjacu. Ništa od ti demonštracjuna, ovod su apatija i beznađe još uvik dil života kod našega puka...eto, ono malo Facebook-ovaca je jedino ča nan je ostalo.

Skidan in kapu do tleva.

A evo če uskoro i promaliče, pa onda kratki rukavi, pa onda đirade po našin Rivama, malo picigina na Bače, pa prve trišnje, a mene pitaju prijateji ma daj reci nan kako se o ovin demonštracjunima piše u EU...a ja in odgovaran, ma koji EU, ma koje pisanje...ajde recite, jeli bilo mrtvi ?...nije, jeli bilo velike ščete ?...nije, jeli bilo puno krvi...hm, ma dikod koja krvava glava oli nos, dvi tri modrice ma ništa specijalno...e pa kad je tako poradi čega bi se o nama pisalo, neš ti ča in je Rvacka bitna...Libija, Egipat...to su udarne visti...tamo se zarađuje lova tamo je plin i nafta...tamo su njiovi interesi...nego ajte vi malo počimat vitrit vaše apartmane, još malo pa če se furešti doč odmarat i guštat u idili Balkana na Jadranu...ma nima straja za turizam dok Facebook-ovci pravidu demonštracjune...ali kad na ulicu dođedu oni 350 ijada eee, to bi bija drugi par postola...

I onda san se probudija...pipan se, je to san ja, ma evo je doša još jedan dan i gledan vanka baca na buru...biče danas jedan lipi dan...prvo gren u kondut a onda čemo vidit kako čemo daje...ča se tiče vrimene malo sunca, malo bure...ma vrime je taman za demonštracjune...a puk, ča puk misli o temu...jema bit da in se takujin još nije ispraznija...

uvik viran dalmaciji

--
http://dalmacija.kovacevic.nl